“Иссиқлик электр стансиялари” АЖ маъмурий биносида “Янги-Ангрен ИЕС” АЖда ЭСГ (Environmental, Social, Governance) йўналишида консалтинг хизматларини жорий этиш бўйича ўтказилган тендер савдолари якунларига кўра ғолиб деб топилган “КПМГ Аудит” компанияси билан ҳамкорликни бошлашга бағишланган старт учрашуви бўлиб ўтди.
Учрашувда “Янги-Ангрен ИЕС” АЖ раҳбарияти, тегишли таркибий бўлинмалар мутахассислари ҳамда “КПМГ Аудит” компанияси вакиллари иштирок этиб, келгусидаги ҳамкорликнинг асосий йўналишлари, амалга ошириладиган ишлар режаси ва устувор вазифалар муҳокама қилинди.
Томонлар томонидан ЭСГ тамойилларини корхона фаолиятига тизимли жорий этиш, экологик барқарорликни таъминлаш, ижтимоий масъулиятни кучайтириш ҳамда корпоратив бошқарув стандартларини такомиллаштириш масалаларига алоҳида эътибор қаратилди. Шунингдек, лойиҳа доирасида халқаро илғор тажрибаларни қўллаш, амалдаги жараёнларни таҳлил қилиш ҳамда самарали бошқарув механизмларини ишлаб чиқиш бўйича келишувларга эришилди.
Мазкур ҳамкорлик “Янги-Ангрен ИЕС” АЖ фаолиятида замонавий ЭСГ стандартларини жорий этиш, ишлаб чиқариш жараёнларининг очиқлиги ва самарадорлигини ошириш, шунингдек, барқарор ривожланиш мақсадларига эришишда муҳим босқич бўлиб хизмат қилади.
"Янги-Ангрен ИЕС" АЖ Матбуот хизмати