«Янги Ангрен ИЭС» АЖ Комплаенс хизмати томонидан Кимё цехи раҳбар ва ходимлари иштирокида «ISO 37301:2021 “Комплаенс бошқарув тизимлари” халқаро стандарти, Ўзбекистон Республикасининг “Коррупцияга қарши курашиш тўғрисида”ги Қонуни, “Манфаатлар тўқнашуви тўғрисида”ги Қонуни ҳамда жамиятнинг Коррупцияга қарши курашиш сиёсати талабларининг амалиётда қўлланилиши» мавзусида ўқув-семинар ташкил этилди. Семинарда комплаенс бошқарув тизимини жорий этишнинг аҳамияти, коррупцияга қарши муросасиз муносабатни шакллантириш, манфаатлар тўқнашувининг олдини олиш, раҳбар ва ходимларнинг ҳуқуқ ҳамда мажбуриятлари, шунингдек ISO 37301:2021 ва ISO 37001 халқаро стандартлари талабларини амалиётга татбиқ этиш масалалари юзасидан батафсил тушунтиришлар берилди.
Тадбир давомида Кимё цехи фаолиятига хос бўлган кимёвий реагентларни харид қилиш ва ҳисобини юритиш, лаборатория таҳлилларининг холислиги, моддий бойликлар ҳаракати, шартномалар ижроси ҳамда ички назорат жараёнларида юзага келиши мумкин бўлган коррупция хавфлари муҳокама қилиниб, уларни барвақт аниқлаш ва бартараф этиш бўйича амалий тавсиялар берилди. Семинар якунида иштирокчилар билан очиқ мулоқот ўтказилиб, қонунчилик ва ички корпоратив ҳужжатлар талабларига қатъий риоя қилиш, комплаенс маданиятини янада юксалтириш ҳамда жамиятда очиқлик, шаффофлик ва ҳисобдорлик тамойилларини мустаҳкамлаш муҳимлиги алоҳида таъкидланди.
